مسيخ الكون

موضوع: مسيخ الكون الجمعة مايو 01, 2009 10:09 am

وبارفض زفــة الوالــى

وباتمرد على الحجّاب

قصاد الباب

وع النصّاب وع القصّاب ويحلالى

أدوس المشعر الكداب بحرف كتاب

ويحلالى أقول موّالى بالعالى

وأفضح كلمة البهتان

وأهتك سترها البالى

ويحلالى ..

أكون إنسان مع الإنســــــان

واكون شيطان مع الشيطان

واكون طـــوفان

بيكسح كل عفن الزيف

وعطن الكيف .. ويحلالى

أكون قوّال وأكون قتــّال

سلاحى الكلمه والموّال

وأسحب سيفى ع البطّال

وع الدلاّل وع الأندال

ويحلالى خضار الريف وكرم الضيف

وحر الصيف بيدفعنى إلى الغليان

على الفتــّان وكل جبــان

بيهدر عزة الإنسان .. ويحلالى

أفتح صدرى للنيران

أواجه فوهة البركان .. وأتصدى

وأقول الكلمه فتــّاكه بألف لسان وأتحدى

وأقول الحكمه هتــّاكه لسر الكون ..

وكن فيكون وفى المليان

********************

بيحلالى

أعــدى بحور خداع النور بقلب جسور

وأنط جدار حصار الزيف

وأحب الضرب ع المكشوف

ويبقى الضرب ع الحامى

وأخلّى سهامى قدامى

يا اكون قاتل يا اكون مقتول

واحب اللعبه ملعوبه ومحبوكه ومحسوبه

ساعتها القول ح يبقى عنيف

أطيح فى الخلق لا أبالى

خسيس الطبع فى الإنسان

ردئ وجبان

ما يعرفشى بأن كرامة الإنسان هدف أسمى وربــّانى

وإن العزه حق أصيل ورحمانى

مسيخ الكون صفيق الوجه والنيه

حقير الفكر شيطانى

وأنا ضده ومهما يكون

عساكر جيشه من خفافيش

جايّه تقش ما تخليش

وناويه تسد عين الشمس

وتطمس طمس حلم الأمس

...........

ح أقول الكلمه فتاكه بألف لسان

وأقول الحكمه للإنســـــــان

أنا شاعر باحب الكلمه وأعشقها

وكن فيكون وفى المليـــــان

*********************

***************

موضوع: رد: مسيخ الكون الجمعة مايو 01, 2009 2:55 pm

بجد عجبتنى اوى وكل قصايدك بتعجبنى
مشكوووووووووووووور